Шардарада Байлар-Жандар ұрпақтары бас қосты

Шардарада Байлар-Жандар ұрпақтарының жиыны өтті

2026 жылғы 11 қазанда Шардара қаласындағы «Абат ата» кесенесінің аумағында Жетісай ауданындағы Байлар-Жандар ағайындарының ұйымдастыруымен жиын өтті. Басқосуға ағайын-туыс жиналып, өзара жүздесіп, ел ішіндегі өзекті мәселелерді талқылады.

Жиын аясында спорттық жарыстар ұйымдастырылды. Атап айтқанда, гір көтеру, қол күресі және қошқар көтеру сайыстары өткізіліп, қатысушылар күш-қайраты мен ептілігін көрсетті. Жарыс жеңімпаздарына арнайы сыйлықтар табысталды.

Басқосу барысында Байлар-Жандар руының басшысы Ислам Әбішев сөз сөйлеп, ағайын арасындағы өзекті мәселелерге тоқталды. Ру ішіндегі бірлікті нығайту, ортақ жұмыстарды үйлестіру және ата-баба мұрасын сақтау жөніндегі ойларын ортаға салды.

Ал Ислам Әбішевтің көмекшісі Оңласын Мақсұтов жиналғандарға Байлар-Жандар ұрпақтарының электронды шежіре сайтының мүмкіндіктерін таныстырды. Ата-баба тарихын жүйелеу, ұрпақтар туралы мәліметтерді жинақтау және толықтыру мәселелеріне тоқталып, әрбір ағайынның осы игі іске атсалысуының маңызын түсіндірді.

Жиын соңында атқарылған жұмыстардың қорытындысы шығарылып, электронды шежіре жобасына үлес қосып жүрген 12 модераторға арнайы грамоталар табысталды. Бұл — олардың ортақ іске қосқан еңбегіне берілген құрмет.

Кездесу барысында келесі жиынды Шардара қаласында өткізуді Алматы қаласындағы Байлар-Жандар ағайындары өз мойындарына алды. Бұл бастама алдағы уақытта да ағайындардың басын қосып, өзара байланысты нығайтуға жол ашады.

Осындай жиындардың маңызы зор. Олар тек бас қосып, көрісу үшін ғана емес, ортақ мәселелерді талқылап, ата-баба мұрасын сақтап, кейінгі ұрпаққа жеткізу жолындағы жұмыстарды жалғастыру үшін де қажет.

Ағайынның бірлігі артып, ынтымағы нығая берсін! Келесі кездесулер де берекелі болып, игі дәстүріміз жалғасын таба берсін!